تقييم مطعم Palermo’s الركن الإيطالي من مجموعة مطاعم ميامي، بورسعيد.

في تقرير النهاردة قرر فريق دووق يزور مكان متعود يروحه من فتره ويعرف كتير عن المنيو بتاعه ويقدم تجربته
منه.

ميامي مطعم مش بقاله كتير ويمكن في ناس كتير متعرفش عنه حاجة هو عبارة عن فوود كورت كامل (مجموعة من المطاعم، باليرموز المطعم الإيطالي، أمريكان استيك المطعم الامريكي، الفيش أوت مطعم المأكولات البحرية، البلاك أند وايت كافيه ده للقهوة والحلويات).

في زيارتنا دي هنتكلم عن الجزء الايطالي وطبعا هناخد معاه الكافيه ومش علشان احنا بنتردد على المكان يبقي منقولش سلبياته لا احنا خدنا العهد اننا نقدم لكم دايما التقرير بشكل حيادي وبقمة الشفافية والمصداقية .

في اكثر الاجزاء سلبية في تقريرنا نزول جميع الاطباق في نفس الوقت من سلاطات ومقبلات واطباق رئيسية لكن الاكثر ايجابية في الموضوع دقة اوقات التقديم وسرعة التقديم بس لازم نلفت النظر لان المكان كان شبه فاضي خاصة باليرموز ولو كان الوقت زاد عن الحد كان الشكل هيبقي بجد سئ جدا

الملاحظات:

  • الإستقبال كان رائع ومن اول ثانية
  • الخدمة من حيث السرعة جيدة
  • من حيث ذوقيات التقديم وقع فريق الخدمة في خطأين الأول فتح زجاجة المياه واللي فيها اجبار علي العميل الخطأ الثاني والأصعب فعلا نزول جميع الأطباق الجانبية والرئيسية في نفس الوقت واللي خلي الأطباق الرئيسية تبرد قبل ما نبدأ ناكل فيها ضيف علي ده أن المقبلات والسلطة مخدتش حقها في بداية التقديم
  • عدم وجود اسم مقدمي الخدمة علي جنب القميص label
  • المقبلات كلها كان بيصاحبها نفس نوع الصوص ودي نقطة مش لذيذة فين التنوع
  • ديكور المكان كان جيد ومريح للعين
  • موقع الكورت كله غني عن التعريف بالنسبة لاهل بورسعيد وكمان مناسب من حيث وجود جراج لمجمع المطاعم بالكامل يمكن يعيب باليرمو انه مالوش واجهة خارجية علي الشارع او البحر بخلاف باقي اجزاء ميامي كورت
  • بمجرد دخولنا تم فتح التكييف نزولا علي رغبتنا وبسرعة حقيقي
  • في الكافيه كان الجودة للحلويات غير مناسبة بالدرجة الكافية من حيث الطعم
  • في العصير للاسف اتفاجأت بعدم وجود عصير البطيخ الطبيعي واستبداله بطعم جاهز للبطيخ

وفي العرض التالي هنتكلم بالتفصيل عن كل طبق منفصل وهنضيف جنبه سعره وطبعا السعر غير شامل الخدمة وبعد كده هنقدم تقرير مجمل بالتقييم الرقمي وتجربة المستخدم في النهاية.

سلطة الجبنة (ميكس تشيز سلاد) 23 جنيه

دي سلطة مكونة من ثلاثة أنواع جبنه زي الموتزاريلا والجودة والشيدر وخلافه ومعاها فلفل حلو ألوان وخس الكابوتشي العريض والكرنب الاحمر والطماطم.

بالنسبة لشكل الطبق كان شهي جدا وكمان الطعم ممتاز وبالنسبة لحجم الطبق كان كافي ليكون طبق سلطة لأربعة أفراد وطبعا الحجم مناسب للسعر.

حقيقي كان طبق ممتاز وأثني عليه كل أعضاء الفريق ويمكن من أكثر الأطباق اللي خدت تقييم عالي ويمكن كان أكتر الأطباق اللي أجمع الفريق علي أنه مناسب لمصاحبة الأطباق الحامية من حيث كمية البهارات الحارة أو التسبيك.

حلقات البصل (أونيون رينج) 21 جنيه

دي عبارة عن حلقات بصل كبيرة في حجمها ومفرغة ومحمرة بعد إضافة مسحوق البقسماط أو الفيجيتار الغير حار ليها، وده بيعتبر من المقبلات وكانت موضوعة حلقات البصل علي قطع صغيرة من الكرنب الاحمر والخس لتحلية الشكل.

بالنسبة للشكل كان جيد والطعم كان ممتاز أما بالنسبة للكمية مقابل السعر كانت عادية وبالنسبة للكمية فهي بتناسب فرد واحد مش أكتر وبرغم أنه الطعم كان كويس إلا أنه كان غير ملفت للنظر لأعضاء الفريق .

بطاطس محمرة بالجبنة (تشيز فريت) 23 جنيه

دي عبارة عن بطاطس محمرة موضوع عليها جبنة الموتزاريلا السايحة الصراحة كان الشكل عادي ويمكن أقل كمان من العادي سعرها مش مناسب للكمية لكن الكم مناسب لفرد واحد والطعم بيساوي الشكل في الطبق ده يعني ياخد درجة عادي وموقفش أعضاء الفريق عنده كتير.

الجمبري الحار (شريمب زينجر) 40 جنيه

في الطبق ده قدم لنا المطعم حبات الجمبري الكرسبي المقلي في زيت بعد غمسه في مسحوق البقسماط الحار والمقلي في الزيت موضوع في الطبق علي الخضار ومصحوب بصوص المسطرده.

الشكل كان جيد، لكن الكمية كانت قليلة حتي لفرد واحد لكن بالنسبة للسعر تعتبر عادية ويمكن تكون غالية كمان، أما الطعم فكان الجمبري مقلي بشكل زايد يصل للون الغامق يعني مش دهبي زي ما اتعودنا عن الحاجات الكرسبي ( محترق ) لكن الطعم الي حد ما كان جيد.

أصابع الفراخ (تشيكين تندر) 25 جنيه

من المقبلات عبارة عن صوابع من الفراخ منزوعة الجلد والعظام مغموسة في خليط البقسماط ومحمرة في الزيت.

حقيقي كان شكل الطبق جيد جدًا واتقدم معاه صوص المسطرده الأصفر برضه، واللي زاد من جمال طعمه برغم أن هو كان طعمه متوسط.

الكمية بالنسبة للسعر مناسبة الا أنها غير كافية لفرد واحد

تونة بيتزا 50 جنيه

من أحد الاطباق الرئيسية اللي طلبناها وبالمناسبة البيتزا من أساسيات المطبخ الايطالي ودي عبارة عن عجينة البيتزا الايطالية مضاف ليها لحم التونة الفاتح مع الزيتون الأسود والفلفل الأخضر وصلصة الطماطم وجبنة الموتزاريلا والبهارات.

الشكل كان ممتاز ويمكن دي الميزة الوحيدة في البيتزا ضيف عليها كمان أن عجينة البيتزا كانت رفيعة ورقيقة بشكل احترافي جدا، لكن بالنسبة للطعم فكان ضعيف، أمّا الكمية فكانت مناسبة لفردين لكن مقابل السعر فهي قليلة الي حد ما .

كوردون بلو 45 جنيه

من الأطباق الرئيسية وهو ليس من الأطباق الإيطالية حيث ينتمي للمائدة السويسرية
وغالبا ما يضاف مع الطبق الرئيسي عنصر واحد إضافي في مطعم باليرمو بخلاف الصوص وهي عبارة عن صدور الدجاج المحشوة بجبن الموتزاريلا ( تسمي الجبن الأزرق ) ومقلية في زيت طلبنا معاها كأضافة البطاطس المهروسة ( ماش بوتيتو ) وكان معاها صوص المشروم أفضل وأجمل وأروع طبق في تقرير النهاردة، وحاز إعجاب كل الفريق لأن الفراخ حقيقي كانت قمة في الامتياز من حيث الطعم. أمّا البطاطس فلم تكن الاختيار الموفق من قبل الفريق وخدت تقدير متوسط لكن من حيث الشكل تاخد تقدير كويس الصراحة.

الطعم بالنسبة للفراخ والصوص كان ممتاز أما الكمية مناسبة لفرد وكمان السعر وإذا طلبت معاه أرز بدل البطاطس المهروسة أعتقد يشبع.

شرائح اللحم البقري المحمرة ( فييل اسكلوب بانيه ) 100 جنيه

أقل طبق في تقييم النهاردة.

الطبق ده من الأطباق فرنسية الأصل وهو عبارة عن شرائح اللحم المرققة بالطرق والمقلية في الزيت بعد غمسها بصوص ومطحون البانيه. طلبنا معاها الطبق الجانبي معكرونة الفوتشيني الايطالية بالصوص الأبيض وكانت المعكرونة أجمل بكتير من الطبق الأصلي وكان مع اللحم صوص المسطرده لرابع مرة!

كان واضح أن رقائق اللحم مُعدّة من وقت طويل ومخزنة بالثلاجة لوقت طويل، كان واضح أن اللحم مقدد وطعم التتبيلة مش ظاهر، يمكن لأن وقت التخزين الطويل أفقد التتبيلة طعمها ونكهتها وكان الملح هو الوحيد اللي ظاهر فيها، ويمكن لما استخدمنا صوص المشروم المصاحب لطبق الكوردون بلو كسر الملح اللي فيها لكنه مكسرش سوء الطعم.

الطعم كان سئ وكمان الكمية بالنسبة للسعر مكنتش مناسبة وكمان الكمية تكفي فرد بالعافية.

في فقرة الحلو هناخد جزء تاني من مجموعة ميامي هو البلاك اند وايت كافيه ( black & white ) واللي مسئول عن الحلويات والمشروبات

تشيز كيك بلو بيري 25 جنيه

الصنف ده من الحلويات اللي ظهر أول مرة في مائدة الحلويات اليونانية إلا إنّ الطريقة الأمريكية في صنعه هي الأشهر يمكن لثاني مرة بيكون معانا التشيز كيك في تقريرنا وده لأن التشيز طبق مميز بالنسبة لفريق دووق واللي بيتكون من طبقة الكيك الرقيقة المصنوعة من البسكويت المطحون والزبدة وعليها طبقة من كريمة الجبنة الحلوة وأحيانا الكريم كراميل واللي بيضاف ليها الطعم بعد خروجها من الفرن (ممكن نضيف طعم الفراولة – التوت الازرق – الشيكولاتة – الكراميل وحاجات كتير ثانية ممكن تضيف الطعم المسكر لكيك التشيز ) واللي بيتكون من الجيلي أو المربي او الاتنين مع بعض بالإضافة للكريم كراميل .

بالنسبة للشكل كان ممتاز، أمّا للكمية مقابل السعر تعتبر مش كفاية، أما بالنسبة للفرد فهي تكفي فرد واحد. أما الطعم ففي ملاحظة هي أنّه مش آخد حقه في التبريد ودي تعيب طبق التشيز كيك لأن أهم حاجة فيه أنه بيتاكل بعد وضعه في جهاز تبريد ما لا يقل عن 3 ساعات، إلا إنّ الطعم كانت لذيذ .

تشيز مادنس مع التوت الازرق 25 جنيه

الفرق بين التشيز مادنس والتشيز كيك هو استبدال الجبنة الكريمي بالآيس كريم، اسمها لو ترجمناه هيبقى الجبنة المجنونة، وهي حقيقي مجنونة لأن شكلها يجنن وطعمها الساقع قمة في الروعة.

شكل الطبق ممتاز جدًا ويمكن ياخد في الشكل تقييم عالي وبالنسبة للكمية مقابل السعر أعتقد إنها مناسبة جدًا،وتكفي أكثر من فرد أما بالنسبة للطعم واجهتنا نفس المشكلة في عدم التبريد الجيد مع عدم تحضير مسحوق البسكويت مع الزبدة بشكل كويس مما أفقد الطعم كتير من روعته إلا أنّ التشيز مادنس كان جيد الطعم من حيث نظافة وجودة المكونات.
ودائمًا ننصح بالتحلية بالتشيز مادنس التوت في مجموعة مطاعم ميامي.

عصير الكيوي مع البطيخ 21 جنيه

ده عبارة عن عصير الكيوي الطبيعي مع طعم ونكهة البطيخ.
بالنسبة لشكل المشروب حقيقي يشجع على فتح الشهية ولو اطلب قبل الاكل هيكون محفز قوي للتشجيع على الأكل لكن السعر أعتقد أنه عالي ومبالغ فيه، وأعتقد إنّ إدارة المطعم عليها مراجعة أسعار العصائر والحلويات والمشروبات وخاصة بالمقارنة مع الكميات. يمكن في فقرة العصائر نادرا ما هنقابل عصير يكفي أكثر من فرد والمشروب ده يكفي فرد بشكل مناسب أما الطعم فبرغم أنه جيد إلا أنّه يعيبه استخدام فلفر البطيخ ( نكهة البطيخ ) بدلا من عصير البطيخ الطبيعي .

درجات التقييم
  • الضيافة
  • الشكل
  • التقديم
  • الطعم
  • التجهيز
  • النظافة
  • الموقع
  • الديكور
3.9

الخلاصة

تجربتنا كمستخدمين وزبائن في المطعم كانت متعادلة، أو بمعنى آخر التجربة كانت في مجملها متوسطة.

Sending
User Review
8.5/10 (1 vote)

اترك تعليق